കൊച്ചി: നഗരമധ്യത്തിൽ അശ്ലീല ആംഗ്യങ്ങളും കമന്റടിയും ചോദ്യം ചെയ്ത ഉദ്യോഗാർത്ഥിനികളെ ക്രൂരമായി മർദ്ദിച്ച കേസിൽ മൂന്ന് പ്രതികളെ എറണാകുളം നോർത്ത് പോലീസ് അറസ്റ്റ് ചെയ്തു. മലപ്പുറം എടപ്പാൾ സ്വദേശി ആൽബിൻ, പാലക്കാട് മണ്ണാർക്കാട് സ്വദേശികളായ സാബിത്ത്, അരുൺ എന്നിവരാണ് പിടിയിലായത്.
​നിരവധി ക്രിമിനൽ കേസുകളിൽ പ്രതിയും സംഭവത്തിലെ മുഖ്യസൂത്രധാരനുമായ അക്ബറിന്റെ ഉടമസ്ഥതയിലുള്ള ലോഡ്ജിലെ ജീവനക്കാരാണ് ഇവർ. നിലവിൽ അക്ബറും സംഘത്തിലെ മറ്റ് അഞ്ച് പേരും ഒളിവിലാണ്. പിടിയിലായ പ്രതികളെ ഇന്ന് കോടതിയിൽ ഹാജരാക്കും.
​അതിക്രമം ഇങ്ങനെ:
​റെയിൽവേ റിക്രൂട്ട്മെന്റ് ബോർഡ് (RRB) പരീക്ഷയ്ക്കായി കലൂരിൽ താമസിച്ച് പഠിക്കുകയായിരുന്ന പാലക്കാട്, കോഴിക്കോട് സ്വദേശിനികളായ രണ്ട് പെൺകുട്ടികൾക്ക് നേരെയാണ് പുലർച്ചെ 4.30-ഓടെ കലൂർ പാവക്കുളം ക്ഷേത്രത്തിന് സമീപം അതിക്രമമുണ്ടായത്.
​ചോദ്യം ചെയ്തതിന് മർദ്ദനം: പഠനത്തിനിടയിലെ ക്ഷീണമകറ്റാൻ ചായ കുടിക്കാനായി പുറത്തിറങ്ങിയതായിരുന്നു പെൺകുട്ടികൾ. ഇടറോഡിൽ നിന്നിരുന്ന രണ്ട് യുവതികളും എട്ട് യുവാക്കളുമടങ്ങുന്ന പത്തംഗ സംഘം പെൺകുട്ടികളെ അധിക്ഷേപിച്ചു. ഇത് ചോദ്യം ചെയ്തതോടെ ഒന്നാം പ്രതിയായ അക്ബർ അശ്ലീലച്ചേഷ്ടകൾ കാണിക്കുകയും ദേഹത്ത് തൊടാൻ ശ്രമിക്കുകയും ചെയ്തു.
​മൊബൈൽ ഫോൺ തകർത്തു: ദൃശ്യങ്ങൾ മൊബൈലിൽ പകർത്താൻ ശ്രമിച്ച കോഴിക്കോട് സ്വദേശിനിയുടെ കൈ തിരിച്ച് ഫോൺ റോഡിലെറിഞ്ഞ് തകർത്തു.
​ക്രൂരമായ മർദ്ദനം: തുടർന്ന് പാലക്കാട് സ്വദേശിനിയെ മുടിയിൽ പിടിച്ച് റോഡിലൂടെ വലിച്ചിഴയ്ക്കുകയും, വസ്ത്രം വലിച്ചുകീറി നെഞ്ചിൽ ചവിട്ടി പരിക്കേൽപ്പിക്കുകയും ചെയ്തു.
​പരിക്കേറ്റ പെൺകുട്ടികൾ നിലവിൽ എറണാകുളം ജനറൽ ആശുപത്രിയിൽ ചികിത്സയിലാണ്. പ്രതികൾക്കായി പോലീസ് അന്വേഷണം ഊർജ്ജിതമാക്കിയിരിക്കുകയാണ്. പ്രദേശത്തെ സിസിടിവി ദൃശ്യങ്ങൾ പോലീസിന് ലഭ്യമായിട്ടുണ്ട്. കൂടാതെ അക്ബറിന്റെ കൊച്ചിയിലെ ലോഡ്ജിൽ പോലീസ് വ്യാപക റെയ്ഡ് നടത്തി.
​പോലീസിനെതിരെയും പ്രതിഷേധം ശക്തം
​"പുലർച്ചെ എന്തിനാണ് ചായ കുടിക്കാൻ പോയത്?", "ഏത് തരം വസ്ത്രമാണ് ധരിച്ചിരുന്നത്?" എന്നിങ്ങനെ ആശുപത്രിയിൽ മൊഴിയെടുക്കാൻ എത്തിയ പോലീസ് ഉദ്യോഗസ്ഥൻ ചോദിച്ചത് പെൺകുട്ടികളെ കൂടുതൽ മാനസികവിഷമത്തിലാക്കിയതായി സുഹൃത്തുക്കൾ വെളിപ്പെടുത്തി. പോലീസിന്റെ ഭാഗത്ത് നിന്നും ഉണ്ടായ ഈ മോശം പെരുമാറ്റത്തെയും വീഴ്ചയെക്കുറിച്ചും ഗൗരവമായി അന്വേഷിക്കുമെന്ന് ഡി.സി.പി അറിയിച്ചിട്ടുണ്ട്.